2018年7月18日 星期三

香港年金計劃,值得投資嗎?

最近很多身邊朋友討論「香港年金計劃」, 大家都有興趣想知道老友記應唔應該投保, 或者孝子賢孫應唔應該幫父母投資呢個年金計劃。 今日就同大家分析下啦。

香港按揭證券有限公司 (HKMC)  全資擁有既香港年金公司於7月頭宣布正式推出「香港年金計劃」, 65歲或以上香港永久性居民可以係7月19日起登記認購。 

係同大家拆解年金既投資價值之前, 我會先簡介一下「香港年金計劃」既運作。

年金(annuity)  就係將一筆錢投保後, 轉化成每月穩定的現金流直至終老。今次政府年金 HKMC 將保證投保人在保證期內可收到投保金額的105%。以投保一百萬及投保人65歲為例, 投保人需要係一開始時投入一百萬,然後男性投保人將可以係未來既182個月(15年2個月) 保證期內每月收到$5800 (182 mths x $5800 = $1,055,600),  女性投保人將可以係未來既199個月(16年7個月) 保證期內每月收到$5300 (199 mths x $5300 = $1,054,700)。 女性保證期較長是因為平均壽命較長。 所以表面上男性每月可收到較高回報, 其實全因男人較短命!

雖然媒體廣泛報道買政府年金, 投一百萬就每月收返五千幾蚊, 但其實唔同投保人每月收到既年金同保證期係唔同既, 佢地係受投保時既年齡影響。例如一個75歲既男人投保一百萬, 佢每月將可收到$7360年金, 保證期就縮短到143個月(1111個月) 。無論你係80歲甚至係85歲都可以投保, 每月收到既年金會隨投保時年齡增高而上升, 保證期就會隨投保時年齡增高而縮短。咁點解個個都係講五千幾蚊因為大部分報道都係用65歲投保做例子。

如果投保人保持身體健康, 係過左保證期後仍然健在, HKMC 將會繼續派年金派到百年歸老個日, 所以的確係越長命越著數, 拎到越多既 bonus 但係咁並唔代表越短命越蝕底, 因為假如投保人係保證期完之前身故, 指定受益人可以繼續收埋餘下既年金直至保證期完 (或可揀一次過收剩餘現金價值) , 所以其實無蝕到。 個人認為, 係考慮政府年金抵唔抵買既時候, 應該用保證期內既回報做 benchmark,  有幸咁長命收到額外既年金就當係 bonus 算啦, 畢竟收唔收到保證期外既年金係有不確定性。

講左咁耐, 咁即係政府年金既回報係幾多一年收到既年金係$69,600 (都係用65歲男性同投保100萬做例子), 但記住回報率並唔係6.96% 點解因為年金係每月還本又還息, 到保證期完既時候係唔會收返個本金100, concept 就同我地供樓一樣, 供完30年就唔會再爭銀行錢, 不過今次就轉左係我地"借錢" HKMC, HKMC 每月還本還息俾我地 。根據政府公布, 政府年金既內部回報率 (IRR)  4%,  係我地去評估年金既投資價值時, 就應該用4%為回報率去衡量。

作為債券小子既我, 當然要同而家市場上差唔多tenor既債券比較一下, 去衡量政府年金既投資價值。 

繼續用65歲男性投保人為例, 保證期為15年左右, "到期日"2033年。 用一啲大家都熟悉既名做比較, 阿里巴巴既2034年到期既美元債 yield to maturity 4.5%,  騰訊2038年到期既美元債 yield to maturity 4.57% 睇落買政府年金收益較低, 但我地要考慮到政府年金係接近 risk free (HKMC S&P評級為 AA+) , 阿里巴巴同騰訊既評級都只係 A+, 有啲 credit risk 既成份, 始終今時今日科技日新月異, 以前既巨頭 Nokia Yahoo 今日已經失晒色, 又有邊個可以睇得清15年後阿里巴巴同騰訊是否可以繼續屹立不倒。 另外, 年金每期都係還息兼還本, 比起直債每期只還息, 係到期日先一次過還本當然係較穩陣。 政府年金每個月有錢收, 比起直債每半年收一次息亦對 cash flow management 較好。 仲有一點, 就係如果大家長命百歲, 咁就可以賺埋個 bonus,  有個 potential upside,  回報就唔止4%

總括黎講, 政府年金4% IRR 係有一定吸引力, 我亦建議大家分配一部分退休資金落政府年金。當然年金都有個好大既缺點, 就係買左基本上係拎唔返舊錢出黎, 除非肯接受一個遠較投資金額低既現金價值。 所以大家一定要先預留定一筆錢去應付突如其來既開支 (主要係醫療開支), 有剩既 spare cash 先再分配一部分投資政府年金。

有興趣了解多啲「香港年金計劃」可以上香港年金網站https://www.hkmca.hk/chi/ , 入面既小冊子有對年金玩法既詳細講解, 同列有不同投保時年齡所對應可收到每月年金同保證期。 網站上提供既年金計算機亦可計算出不同時候所對應既剩餘現金價值。

沒有留言:

張貼留言